Dempuèi sa debuta a la fin de 2019 l'epidemia de covid-19 se perseguís de pel mond, evoluís, de variants apareison. Diferents tipes de vaccins son disponibles dempuèi la fin de 2020 e emplegats amb un relatiu succès per aparar las gens dels efèctes mai grèus de la malautiá : son a ARN messatgièr, a vector viral o proteïc.

Diferentas questions se pausan desenant en 2022. Cossí orientar la recèrca ? Sus quina tecnica investir per l'avenir ? Cossí organizar exactament las campanhas de vaccinacion ?

Per i respondre l'Organizacion Mondiala de la Santat (OMS) metèt en plaça un grop independent d'expèrts. Aqueste estúdia las mutacions del virus e cèrca de definir la melhora estrategia de metre en plaça per luchar contra la covid-19.

Mas lo problèma que se pausa amb aquesta malautiá e lo virus SARS-CoV-2 que n'es responsable es que pauc de donadas son disponiblas contrariament a la gripa. Las mutacions d'aquesta son seguidas e los vaccins son cada an concebuts en foncion. Demai la dinamica de son evolucion es coneguda, se sap que depend de las sasons. En foncion de totas aquelas donadas una estrategia es estada mesa en plaça dempuèi d'annadas per ne limitar los efèctes.

Es tot aquel trabalh que deu èsser fach per la covid-19 mas las informacions disponiblas per aquesta malaitiá son escarças. Una de las prioritats al còp de las agéncias regionalas o mondiala coma l'OMS o l'EMA, l'Agéncia Europèa dels Medicaments, e del industrials es d'aver de donadas. Son a las recampar per fin d'establir una politica perena.

L'estrategia seguida pel moment amb de rapèls regular de vaccin sembla pas adaptada sus de tempses longs.

Dins l'ideal l'OMS desirariá de veire espelir un vaccin unidòsi qu'aparariá las gens sus una durada d'al mens un an e que podriá èsser administrat amb d'autres vaccins ja emplegat coma lo de la gripa.