La societat Airseas ven de signar (junh de 2019) amb l'armator japonés Kawasaki Kisen Kaisha (K Line) un contracte per equipar 50 vraquièrs amb de velas de traccion.
La societat Airseas basada a Tolosa s'es donada per prefach dempuèi 2016 de trobar de solucions per melhorar lo bilanç carbòni del transpòrt maritim en esplechant l'energia del vent.
Lo engenhaires desvolopèron per aquò un sistèma que permet en foncion de la meteorologia d'indicar lo moment ont l'utilizacion del parafòil ven profitabla e, automaticament, de lo metre en foncion. Las velas fan entre 500 e 1 000 mètres cairats.
Mestrejan uèi pro lor tecnica per poder vendre una solucion industrialament profitabla. Permet d'esparnhar entre 20 % e 40 % de carburant e de limitar en consequéncia las emissions de CO2 dels batèls tot en fasent mermar los còsts.
