Ven de se dubrir (fin de 2017) en Illa de França un supermercat Les Halles de l'Aveyron dedicat als produches roergats. Es la cooperativa Unicor qu'es a l'origina del projècte.
Es localizat a Saint-Gratien en Val d'Oise.
Aquò's pas la primièra estructura d'aquela mena. Les Halles de l'Aveyron d'Herblay, totjorn en Val d'Oise, permetan ja als parisencs de s'aprovisionar en produches de qualitat dempuèi 2014. Lor primièr magazin dubriguèt a Rodés en 2008.
Es lo succés d'aqueles primièrs projèctes que butèt los entreprenaires avaironeses a persegir l'aventura.
Unicor es una cooperativa compausada de mai de 9 000 productors localizats mai que mai en Avairon, mas tanben en Tarn, Lozèra, Cantal o Tarn e Garonne.
L'estructura a per ambicion de valorizar la produccion agroalimentària d'aquelas regions occitanas.
Los produches : cars (vedèl, anhèl, pòrc, buòu...), formatges, tripons, aligòt, vins, mèls... mas tanben : cagaròls, chips, pizzas, cervesas...
Los tres magazins (lo de Rodés e los dos francilians) an permetut la creacion d'un centenat de pòstes de trabalh. D'autres projèctes son en cors de desvolopament.
