Fa 20 ans, en 2002, defuntava Cristian Laus, escrivan e lexicograf, un dels actor màger de la vida culturala occitana Albigesa de la segonda part del sègle XX.
Jos l’impulsion del Centre Cultural Occitan d’Albigés e amb l’ajuda e la participacion d’associacions, personas e estructuras amb las qualas trabalhèt, se decidiguèt l’organizacion d’una Annada Laus, annada omenatge a l'autor mas tanben a sa molhèr Janina Laus, defuntada en 2021.
Divèrsas accions seràn organizadas, caduna evocarà lo trabalh de tota una vida consacrada a la lenga e la cultura occitanas, e contribuïrà a manténer lor sovenir.
Conferéncias, testimoniatges, mòstras, emissions de ràdio... Mas tanben inauguracion de l'estúdio d’enregistrament de Ràdio Albigés e de la bibliotèca « Laus » del Centre Occitan Rochegude pendent l’annada 2023 !
Cristian Laus trabalhèt de longa per la lenga, per l’ensenhament, per la recèrca occitana, per l’edicion, per la ràdio, compliguèt una òbra plan divèrsa e fòrça importanta. Demest sas publicacions, se pòt citar los dos diccionaris francés-occitan e occitan-francés, l’antologia Albigés país occitan, quatre romans que dos son autobiografics, l’edicion d’obratges d’autres autors. Trabalhèt tanben sus Marianna, suls trobadors, sus Enric de Ròcaguda, sul Novèl Testament catar, suls tèxtes en occitan dels notaris albigeses, sus l’occitan dins la premsa tarnesa.
Aquesta annada Laus debutèt lo dissabte 17 de setembre de 2022 al Centre Occitan Rochegude amb una presentacion generala de son òbra occitana per Ramon Ginolhac.
