Dins lo sieu magazine de mars e abril de 2017 la region Occitània comunicava sus la signatura d'una convencion per l’ensenhament de l’occitan.

Signèron per l'ensenhament de l'occitan

Lo 26 de genièr passat, en preséncia de Najat Vallaud-Velkacem, ministra de l’Educacion nacionala, de l’Ensenhament superior e de la Recèrca, la presidenta de la Region Occitània / Pirenèus-Mediterranèa, Caròla Delga, signèt una convencion per l’ensenhament de l’occitan que recampa la nòstra region, Aquitània Novèla, l’Estat e l’OPLO (Offici Public de la Lenga Occitana). Aquel tèxt pòrta, a l’escala de cinc Acadèmias (Bordèu, Lemòtges, Peitieus, Tolosa e Montpelhièr) una ambicion que s’apièja sus de dispositius avantatjoses e de nombrosas proposicions novèlas.

L’objectiu es de trabalhar amassa, d’unir las fòrças e de pensar l’ensenhament sus un territòri grand, amb coeréncia e intelligéncia. L’estat dels luòcs, o coneissèm, suscita qualques inquietuds e l’enjòc es de talha.

Un comitat de pilotatge interacademic es constituït, es una vertadièra volontat de presa en man de l’ensenhament de l’occitan a l’escala inter-regionala que se perfila.

Aquesta signatura daissa entreveire de jorns melhors pels professors, ensenhaires e militants qu’òbran, dins de condicions sovent dificilas e sens gaire de reconeissença, per la transmission d’una lenga e d’una cultura qu’apartènon, sens deguna distincion, a totes los dròlles del territòri nòstre. La Region Occitània / Pirenèus-Mediterranea s’engatja, aquest an seràn quatre millions d’èuros que seràn investits en favor d’una politica per las lengas occitana e catalana.