Russia per l'intermediari del patron de l’Agéncia espaciala russa, Roscosmos, Iouri Borissov, anoncièt dimars 26 de julhet de 2022 qu'anava arrestar d'esplechar l'ISS (Estacion Espaciala Internacionala).
Iouri Borissov declarèt que la prioritat en matèria espaciala èra la construccion de l'estacion russa.
Aquela decision interven alara que la guèrra en Ucraina se perseguís e que los mejans tecnics de desvolopament d'infrastructuras complèxas de Russia son limitats en rason de las sanccions occidentalas que limitan las liurasons de material de nauta tecnologia.
Malgrat los anóncis de las autoritats lo sector espacial rus manca clarament de mejans e d''inovacions. Lo darrièr modul rus restacat a l'ISS, Nauka, que deviá jónher l'estacion en 2007 foguèt amarat pas qu'en 2021. Un amaratge problematic que faguèt virar accidentalament l'estacion.
