En març de 2021 alara en plena pandemia l'IEO d'Avairon, a l'atencion de sos aderents, comunicava sus sas activitats.
Amassada Generala de l'IEO 12
Sabèm ben que los tempses que sèm a viure d'aquesta passa son mai que penoses per totes... mas de qué seriá se las associacions fasián pas lo trabalh de sociabilitat minimum, de qué seriá se l'IEO 12 fasiá pas res, de qué seriá se l'IEO 12 èra mòrt ?
Mas malastrosament es de racacòr que vos anonciam que l’Amassada Generala prevista lo dissabte 27 de març, nos serà pas possible de la téner que la Maison des Associations (MDA) es barrada dusca a una data inconeguda per ara. Pr'aquò soscam a cossí la téner e quora. Una convocacion vos serà mandada tanlèu la data causida e possibla.
Rampèl : lo conselh d'administracion foguèt elegit per dos ans e i aurà pas d'eleccions ongan.
Los corses de lenga e las animacions previstas en 2020 se poguèron pas téner normalament per causa de la marrana, tres corses foguèron assegurats en octòbre de 2020.
La Prima prevista al mes de març de 2021 a Marcilhac es reportada tanben. Se tornarà far pus tard, o cal esperar ! Nos cal crosar los dets per tal de poder realizar los projèctes ja programats dins l'annada de 2021 e aital de nos poder acampar tornarmai a l'entorn de la lenga e de la cultura occitanas.
Lo Burèu de l’IEO 12, lo 4 de març de 2021
