Lo dimècres 1èr de decembre de 2021 a 18h a l'Ostal de las associacions de Rodés l'IEO d'Avairon organizarà una presentacion del libre Diablògues de Roland Dubillard.
Los tèxtes son estats revirats en occitan per Cristian Andrieu e editat per Martina Prévôt que baileja las edicions Edite-moi !
Dins aquelas dètz peçòtas tornarètz trobar tota la fantasiá que Roland Dubillard metèt dins son òbra. Al còp umor, emocion, suspresa. Aqueles Diablògues son estats causits per la varietat de las situacions que prepausan, simplas mas cargadas d'inventivitat poetica e dramatica.
La traduccion en occitan, dins una lenga del cada jorn ausida dins l’enfança, permet ara a totes de las legir, de las jogar e del las metre en scèna. Aquel recuèlh completa utilament lo repertòri del teatre en occitan.
Roland Dubillard nasquèt a París en 1923, moriguèt a Vert-le-Grand en 2011. Es un escrivan, dramaturge e comedian francés. Escriguèt de pèças de teatre, de novèlas, de poesias, qualques ensages e un jornal intime. Jògava plan sovent dins son òbra de l’absurditat de las situacions. D’unes lo diguèron fraire espiritual de Ionesco e de Beckett.
Foguèt tanben comedian, pel teatre e pel cinèma. Trabalhèt per Alain Resnais, Michel Deville o encara Jean-Pierre Mocky. Joguèt el meteis aqueles Diablògues escriches en 1975 que son dempuèi regularament mes en scèna. François Morel e Jacques Gamblin ne son los darrièrs actors famoses recensats, meses en scèna per Anne Bourgeois.
Roland Dubillard reçaupèt :
- lo grand prèmi nacional de teatre en 1979 ;
- lo grand prèmi de Teatre de l’Acadèmia Francesa en 1995 ;
- lo grand prèmi dels poètas en 2006 ;
- lo Molière de l'autor francofòn vivent per Les Diablogues en 2008.
La presentacion de Rodés lo 1èr de decembre es dubèrt a totes e totas. Es a gratis.
