Estat de l'Union Europèa 2022
Ursula von der Leyen a Estrasborg lo 14 de setembre de 2022 © Comission Europèa

Lo dimècres 14 de setembre de 2022, Ursula von der Leyen presidenta de la Comission Europèa, prononcièt son discors sus l'estat de l'Union.

Son allocucion se debanava alara que l'actualitat, al còp politica e economica, èra cargada amb una crisa energetica deguda per part per la guèrra en Ucraina e una inflacion fòrta.

La presidenta anoncièt que l'Union anava crear una banca publica consacrada al desvolopament de l'energia idrogèna. Aquesta banca permetrà d'investir tres miliards d'èuros per bastir lo mercat futur.

Son dètz milions de tonas d'idrogèn renovelables que l'Union deuriá poder produsir cada an. Aquesta energia aurà per vocacion de remplaçar las energias fossilas dins l'industria e dins los transports pesucs (trens, batèus, utilitaris rotièrs...).

Al delà, es tot lo mercat de l'energia en Euròpa que segon ela deu èsser tornarmai pensat e reformat per melhor contrarotlar la pujada dels preses e assegurar l'independéncia dels europèus.

Ursula von der Leyen tornèt afortir a l'escasença de son allocucion la solidaritat e lo sosten de l'Union Europèa a Ucraina alara que se perseguís la guèrra. Olena Zelenska molhèr del president ucrainés Volodymyr Zelensky, èra presenta a Estrasborg per escotar la presidenta de la Comission.