L'Institut d'Estudis Occitans d'Aude organiza a Carcassona l'eveniment Escritura 2017. Un moment de rescontres e d'escambis centrat mai que mai sus la literatura occitana o los libres sus Occitània.
La manifestacion se dobrirà a l'Ostal Sirventés (79, la Trivala a Carcassona), lo dijòus 31 d'agost, a 18h30 amb l'estrena de la mòstra Las Musas de 2017 e de las òbras del Grop Aqüarèla del Cercle Occitan del País de Carcassona.
Dimenge 3 de setembre, a l'escasença de la Fièra als Trastes del barri, l'Ostal Sirventés jogarà a « pòrtas dobèrtas » long de la jornada.
Los tres rendètz-vos mai literaris seguiràn :
- Dijòus 7 de setembre, a 18h30, per descobrir, a travèrs la lectura d'unes passatges, lo libre de Jules Rivals L'âme terrienne (CS-Prod) consacrat a 1907, eveniments contats amb estrambòrd e transformats per l'autor en una epopèa populara.
- Dimècres 13 de setembre, a 18h30, per parlar de la naissença del moviment obrièr a Seta amb Alan Cameliò, autor de l'estudi Una Séença a la borsa plata (IEO-Lengadòc). Un obratge ont, a partir d’una pèça de propaganda anarquista publicada en 1905 per lo carretièr Pascau Verdale, Alan Cameliò descriu l’ambient e l’istòria sociala, economica e culturala d’aqueste moment ont, a Seta coma endacòm mai, l’idèa de crear una societat novèla grelhava dins l’èime dels trabalhadors.
- Dijòus 21 de setembre, a 18h30, per rescontrar Miquèla Stenta, autora de l'obratge Marcelle Delpastre, à fleur de l'âme (Vent Terral, 2016, fotografias de Charles Camberoque) qu'evocarà la granda escrivana lemosina e occitana Marcèla Delpastre per contribuïr a la coneissença e a l'espandiment de son òbra (poesia, contes, sovenirs, etnografia...).
Dijòus 28 de setembre, a comptar de 20h, en dirècte dempuèi Ciutat, Òc-Tele virarà en dirècte una emission consacrada a l'eretatge dels trobadors a Carcassona.
