Un article d'Edmond Romieu - La Beluga 68 - Revista del club occitan de Noisy le Grand
Portam dòl d'un crane malastre.
Lo 3 de julh de 2011, de nuèch, sus un camin grand de Catalonha, Anna Mauri Graels e lo Lugan Bedel tornavan en França. Quitèron tròp joves aqueste monde.
Anna, catalana, especialista del parlar occitan, saberuda dels trobadors, èra emplegada de l'Ostal Occitan, carrièra Malcosinat a Tolosa. Lo Lugan, estudiant a París lo veguèrem a la Velhada d'Auvèrnha, a Ràdio País, als Amics de la Lenga d'Òc, a l'Ostal de las Amicalas d'Avairon, animator de l’Aper'Òc.
Agantèt un pòste al servici de las talhas a Tolosa. Lo 6 d'Agost de 2011 a l'amassada del Grelh Roergàs, çai èra pas lo Lugan, elegit antan capiscol d'aquela Associacion Felibrenca màger. Sonca una fòto disiá de butar la rega dubèrta.
Anna èra dins sos trenta tres ans, lo Lugan sos vint e uèch, afilhat de l'Ostal d'Occitània, de l'Institut d'Estudis Occitans, de l'Associacion Occitana de Castanet, de Convergéncia Occitana. Dos espèrs de la Lenga d'Òc virats en dòl.
Solidaris que sèm al Club Occitan de Noisy de la dolor de doas familhas e amics, los gardam vius dins nòstre còr.
E. Romieu
