Los 16 e 17 de mai 2020 a Mèsa se debanaràn los 24ens Rescontres de la cançon occitana.
La primièra tòca d'aqueles encontre segon los organizators es de faire se recampar de mond : individuals, grops, còrs, qu’aiman cantar en occitan e vòlon partejar aquel plaser amb de cants novèls e d’un còp èra, estacats que son al reviscòl de la cançon occitana jos totas sas formas.
Aquela manifestacion, que se vòl festiva pels cantaires coma pels auditors amb passa-carrièra, brasucada de muscles, repais e presentacion dels repertòris en public sus l’empont, es organizada pel cercle occitan Lo Buòu.
L’Institut d’Estudis Occitans d’Erau acompanha dempuèi la debuta l'eveniment mercés a l’ajuda del Conselh general d’Erau.
Cada an los Rescontres fan descubrir de cantaires, en còrs, en grops o individuals, emai de cançons novèlas, desconegudas o reviscoladas. Aquò’s una accion concreta e de tria dins la promocion de la lenga occitana.
Ongan l'estagi de polifonias se farà jos la responsabilitat pedagogica de Danielle Franzin. Aquel estagi a per tòca de desenvolopar lo cant polifonic. Es dobèrt a totes, òmes, femnas, adolescents, individuals o en gropes ja constituïts.
