Lo Jai

Los musicians del grop Lo Jai

En 1982 sortissiá lo disc de musicas tradicionalas del Lemosin del grop Lo Jai. dins la revista Aicí e ara de novembre de 1982 Silvià Rebièra ne fasiá la critica.

Musiques traditionnelles du Limousin (Disc Revolum REV 038, Tolosa, 1982)

Los primièrs ensages dels grops neò-folclorics occitans dins las annadas setanta èron pas gaire estrambordants. En volguent se demarcar a tota fòrça del folclorisme classic, tombavan sovent dins l'a pauc près. En assajant de ligar las formas musicalas eretadas d'una tradicion païsana a las mòdas gauchò-ecologistas en onor dins los mitans estudiants politizats, podián pas balhar qu'una bolhaca cabretejaira per balètis a bon mercat.

Fòrt aürosament, de grops mai ambicioses se son formats dins totas las regions. Lo Jai n'es un. Avèm aquí quatre musicaires de grand talent qu'an près la pena de se passejar pels camps, de frequentar los darrièrs musicians locals (violonaires, cabretaires, acordeonistas), de pescar fòrça musicas e fòrça cants que, sens eles, se serián perduts. (Dins aquesta besonha de recèrca etnografica, son estats ajudats per l'associacion dicha dels Musiciens routiniers).

Avèm donc un disc d'una granda autenticitat, amb una pocheta que planhís pas las explicas de tota mena suls instruments, las melodias e lor interpretacion. Los que conéisson la musica veiràn que res aqui es pas daissat a l'asard, e que totas las causidas instrumentalas o melodicas an lor justificacion.

Los musicians del Jai an una idèa precisa de lor trabalh, qu'es de « choisir certains traits musicaux, certaines constantes observées, de les amplifier, d'en proposer une image à la fois authentique et stylisée », per tal de balhar « une proposition de musique limousine interprétée, une possibilité parmi d'autres de concevoir un répertoire et son interprétation ».

L'amor del terrador, lo respècte de las tradicions e la volontat de far per uèi una musica populara que – coma auriá dich Perbòsc – pesque a las vièlhas fonts sens s'i negar al fons, fan d'aqueste disc una reüssita totala.

Silvià Rebièra

Lo Jai - Musiques tradicionnelles du Limousin


Los romans de Cristian Chaumont

Los darrièrs romans de Christan Chaumont

Cristian Chaumont publiquèt son primièr libre en 2010 a IEO Edicions, un roman policièr d'un pauc mai de cent paginas que revolucionèt pas las letras occitanas mas qu'aviá alara lo merite de donar a la literatura nòstra un libre dins un genre un pauc delaissat : lo policièr.

Antonin Perbòsc : Fuòc nòu (1904)

Antòni Perbòsc

Article d'Antonin Perbòsc publicat pel primièr còp dins la revista Mont-Segur en 1904.

Ajuda militara a Ucraina : Caesars e missils AASM

Missil AASM

Lo 18 de genièr de 2024 lo ministre de la defensa francés Sébastien Lecornu anoncièt un cèrt nombre de mesuras per ajudar Ucraina dins sa lucha contra l'occupant rus.

Joan-Loís Segondy : presentacion del libre 'D’aucèls e d’òmes'

En 2023 sortissiá lo libre D’aucèls e d’òmes de Joan-Loís Segondy.

L'occitan es un balon de rugbi !

rugbi

En setembre de 2013, J. B. publicava sul site de l'IEO d'Aveyron lo sieu punt de vista sus la lenga occitana.