La produccion d'electricitat mercés a la fusion de l'idrogèn es una de las solucions que permetràn deman d'aver denergia a un mendre còst e en quantitat.
Diferentas configuracions son a l'ora d'ara consideradas, mai que mai per de laboratòris publics.
Las recèrcas mai avançadas se pòrtan suls mejans de manténer de plasma confinhats per de camps magnetics en configuracion tokamak o stellarator.
Es tanben possible de far fusionar d'idrogèn d'un biais diferent en confinhant la matèria — de deuterium e de tritium — d'un biais dich inercial amb de lasèrs.
Un actor privat venguèt recentment propausar una biais novèl de far fusionar l'idrogèn : Helion Energy.
Creada als Estats Units en 2013 l'entrepresa a per ambicion de produsir d'energia electrica mercés a la fusion nucleara via una tecnica dicha magneto-inerciala.
En 2023 la societat anoncièt un acòrd amb Microsoft per li fornir d'energia electrica tre 2028. Sam Altman CEO d'OpenAI participa tanben al finançament de Helion Energy.
La fusion magneto-inerciala es un procèssus de fusion per confinhament inercial, ont demai un camp magnetic extèrne es aplicat per fin d'augmentar encara lo confinhament de las particulas e lo nombre de reacion de fusion.
L'electricitat serà produsida dirèctament en convertisent l'energia del camps magnetic generat per la fusion en energia electrica.
En febrièr de 2026 la societat anoncièt qu'aviá poscut montar un plasma de deuterium e de tritum (D-T) a 150 milions de grases Celsius amb lo reactor Polaris, setena generacion de reactor fabricat per Helion Energy, en foncion dempuèi la fin de 2024.
