Dins son edicion del mes de novembre de 2021 lo magazine de la vila de Tolosa donava la paraula a Mickaël Vidal, musician.

« Voliái pas far de trad, èra la musica de mon paire »

Mickaël Vidal, 25 ans, es una novèla figura de la musica tradicionala, que multiplica las aventuras.

Jogatz dins un molon de formacions diferentas, es una causida o una necessitat ?

Es vertat qu’ai un paquetàs de formacions, miladieu : Dirty Caps, Septembre, Farce Dur, en sòlo, amb mon paire... N’i a sièis màgers e un fum de collaboracions a costat. Aimi plan de n’aver tant, de pas virar tostemps amb lo meteis grop. Me permet de cambiar de repertòri, de veire de mond diferents. Se faguèt aital, sens lo soscar.

Soi d’una familha de musicians, mas l’idèa que la musica siá mon mestièr m’es venguda tard, perque voliái me far mon camin a ieu. A costat dels grops, ai d’activitats pedagogicas tanben : balhi de corses de barri, ai fait lo professor de musica pendent cinc ans al collègi Calandreta e soi professor d’acordeon diatonic al Conservatòri.

Jogatz de fòrça instruments, mas vòstre percors es puslèu marcat pels instruments a vent.

Pichon, mos parents me daissèron pas la causida de far de musica, mas me daissèron la causida de l’instrument. Comencèri pel saxofòn pendent gaireben dètz ans a Fijac, e un jorn trobèri una clarineta a l’ostal e passèri sus aquel instrument. Ara, sus l’empont soi mai que mai a la clarineta e al cant. Jògui tanben de boha, de bodega e, doncas, d’acordeon. En concèrt, vòli pas aver tròp d’instruments, per gardar un son del grop e èsser mai eficaç.

Fin finala, quina plaça aguèt vòstra familha dins vòstre percors ?

A la debuta, voliái pas far de muscia tradicionala, qu’èra aquela de mon paire. Es a 14-15 ans que nos trobèrem una còla d’adolescents a l’associacion La Granja dins Òlt e comencerèm de far de trad. Venguèri puèi a Tolosa perque mon paire prenguèt de foncions al Conservatòri. Coneissiái lo mitan de la musica, mas pensavi pas seguir lo camin familial. Mai tard, amb lo Duò Abela-Vidal, mon cosin Guillaume Lopez foguèt important perque nos prenguèt dins lo catalòg de sa companhiá.

Ongan, descobrissi una novèla activitat dins l’audiovisual : Octele me recrutèt per far de reportatges e ai un pichon ròtle dins una ficcion que se ditz La Seria.

Magazine À toulouse 83, novembre de 2021


Lei santons de Provença

Sus los santons de provença, un article de la revista del conselh general de las Bocas de Ròse, Accent de Provence, numèro 263, novembre e decembre de 2016.

Joan Fourié sus Renat Nelli (1982)

Renat Nelli (René Nelli)

Un tèxt de Joan Fourié publicat dins la revista Aicí e ara (mai de 1982).

Los Païses Basses e Danemarc mandaràn a Ucraina de F-16

F-16C

Dimenge 20 d'agost de 2023, Mark Rutte, primièr ministre neerlandés, anoncièt que de F-16, avion de combat de concepcion estatsunidenca, serián mandats a Ucraina per los Païses Basses e per Danemarc.

Entrevista de Ernest Bergez, Sourdure

Dins son magazine dels meses de julhet e d'agost de 2019 la vila de Tolosa publicava una entrevista del musician Ernest Bergez, dich Sourdure, que presentava al mes de julhet son espectacles al Metronum.

Ives Roqueta sus Frederic Mistral

Tresor

Un article de Ives Roqueta (junh de 1998). Sorsa : Lo Lugarn numèro 86/87, 2004.