Séverine Bonnin

Detalh de la cobèrta del disc de Séverine Bonnin, 'Fuòc en gàbia'

En novembre de 2024 en corsega se debanava lo Liet Internacional, considerat coma l'eurovision de las lengas minoritàrias. Dins son edicion del mes de novembre de 2024, lo jornal de la comuna de Tolosa, À Toulouse entrevistava la cantaira Séverine Bonnin qu'i participèt.

De ròck occitan a l'Eurovision de las lengas minoritàrias

— De qu'es lo Liet internacional ?

Es l'eurovision de las lengas minoritàrias. Un concors que se debanarà ongan a la fin de novembre en Corsega. E foguèri retenguda amb ma cançon Catharsis. Es en occitan mas es un amic còrse, istorian passionat pels Catars, que l'escriguèt primièr. Es una polida guinhada.

— Fa gaire de temps qu'avètz començat a cantar en òc pasmens ?

Soi d'una familha de cantairas, ma maire e ma grand cantavan, aviái enveja de far mon pròpri projècte e voliái pas cantar en francés o en anglés. Aguèri un còp de còr per la lenga occitana : son percors, son istòria, l'engatjament que representa. La primièra cançon se publiquèt en decembre 2019, puèi un album en genièr 2020 e foguèt pas aisit qu'arribava lo COVID darrièr. Mas aguèri sulpic la reconeissença de mon single amb la segonda plaça per la jurada de la cançon occitana de l'annada.

— De qué cambièt dins vòstre rapòrt al territòri, de parlar occitan ?

Çò qu'a benlèu mai cambiat es mon ritme de vida ! Soi ara plan investida dins la cultura occitana amb la cançon, mas tanben lo teatre dins la compania La Comedia Tolzana. Pensavi pas n'arribar fins aquí. Veni de Champagne a l'origina, arribèri jova quand ma maire venguèr trabalhar a Tolosa. Ara, me sentissi occitana completament. Coma ditz l'escrivan Franc Bardou, que me fa de tèxtes : « Parlas occitan, siás occitana ».

— De qu'es vòstre estil musical ?

De ròck. Dins los títols que canti i a mantun estile de ròck : pòt tirar cap al jazz, cap de ritmes mai country, pop. Dins la cançon Cartharsis avèm integrat de sons medievals. Aimi de barrejar las culturas, en tornant totjorn cap al ròck. Es una musica que correspond als tèxtes que vòli cantar : engajats per la cultura, per l'environa, amb de subjèctes tanben d'amor o d'Istòria.

Magazine À toulouse 110, novembre de 2024


Viure 1965 : Revolucion Occitana

La revista Viure fondada en 1964 foguèt pendent un desenat d'ans lo luòc d'expression privilegiat per la critica, las analisas, l'expression d'una pensada occitana liura.

Teatre : 'Geronimo' d'André Benedetto

Lo Geronimo de Benedetto

En 1974 André Benedetto montava la pèça Geronimo, los redactors de la revista Revolum dels mes de genièr de 1975 ne rendián compte.

Votacion del Parlament Europèu per melhorar la mobilitat electrica

Lògo recarga electrica

A la debuta del mes de julhet de 2023 lo Parlament Europèu votèt per l'adopcion de règlas novèlas per fin de far créisser lo nombre de las estacions que permeton de recargar los veïculs electrics. Las novèlas disposicions preveson tanben de ne facilitar l'usatge.

Conte : 'Lo meu ostal' de Joan Bodon

Plancat

Lo recuèlh Contes del meu ostal de Joan Bodon sortiguèt en 1951.

Los mots de milhau

En 2015 sortissiá lo libre de Martine e Jacques Astor, Los mots de Millau.